‫مجموعة مواهب ايت اعزة Ait Iaaza Talents Group‬

سمعوا يابنوا عريبان ماشي غير الثيرانات أولا ماجرى فلفيضانات وكل الكوارث والآفات
لبلاد راها وقفات البزولة نشفات لعباد تقهرات.لاعبين علينا الجمعيات ضاحكين فينا النقابات .آش لينا بهاد الانتخابات ولاش كثرة الوزارات
سايكينها براهش وعيالات لبلاد راها نشفات ولعباد تقهرات مكاين غير فلان وسي بن فلان وسي الواكل بن الشبعان واش بان ليكم غير الماء فثيران ونسيتوا الشعب الهلكان الجوعان مسدودين عليه شلا بيبان
مكاين غير سي الفاسي ولد الفاسي والدرويش ايعاني وقاسي
شلا فضايح ماعندها عنوان وشلا وجوه مافيها امان وشلا مصايب من البعد تبان وشلا خيرات نهبوها العديان متتقدر بثمان
واش مبان ليكوم غير الثيران انعل بوها كورة والأمة محكورة من قفاها مجرورة على الدل مجبورة انعل بوها كورة
حنا بنوا عريبان لاعدل لا ميزان لارحمة لا حنان لي طلع وزير يولي ثعبان
ودير الحراسة والشيفور ومدير الديوان يسرق ينهب وخرج عينيه فلبرلمان
حنا بنوا عريبان معروفين بلغدر والنفاق والنميمة والغش والتزواق
حنا بنوا عريبان أوفى منا بنوا كلبان وأرحم منا بنوا ضبعان عايشين فبنوا زبلان حنا بنوا عريبان ضحكة فكل البلدان
واش مبان ليكم غير الثيران يعمر بلماء ولا يدي بوه الطوفان وراه شلا عيوب مزال تبان وشلا غيران وشلا مسؤولين والفوا فينا العضان
وشلا قناطر جرفوها الوديان وجرفوا معاها أموال الشعب الهلكان
واش مبان ليكوم غير الثيران ينعل بوها كورة وينعل بو الجامعة لي زايدانا فنقصان وينعل بو الوساطة لكبرت لبوهوم الشان
واش مبان ليكوم غير الثيران يهاد الشعب الهلكان وشحال من شبعان
نهب أموالكم وصبح هربان وقالوا ليه عفى الله عما سلف ويرجع على قلوبكم يتربع فرحان
واش مبان ليكم غير الثيران يهاد الكنس العيان
شلا وديان هاجت وشلا ديور رابت وشلا عائلات خابت ونتوما لاعين شافت
الحقد فقلوبكم نابت
شبان تقصاو فليمتحانات رغم الاجتهاد والمعانات كلشي بالواسطة كولشي لولاد العائلات حنا غير ولاد الفقر والآهات ينعل بو الثيرانات ولي يلعب فثيرانات ولي ياكل فثيرانات فين الوعود من ديك العهود وفينهيا الخطابات
لي حكم جماعة ياكل حق جماعة يسرق وينهب ويجمع القاعة ويعطي انجازات فتلفزة والاداعة
ولي تربع على بلادية يغربل الميزانية وجيب الستاتي والستاتية
والعيطة المرساوية واللغثة الهوارية والدقة المراكشية
والطز فيك أفيا يالي تصوط بورقة قرفية حنا غير أمة جاهلية دخلات فثالت ألفية وباقي القفة عليها مكفية
الفلاحة تبكي بدموع- البوادي يهددها الجوع- الأخطبوط يلعب فأراضي الجموع -صوت المظلوم ماهو مسموع- جبال تضوي بشموع- ولي دوى يكسروا لو ضلوع-
الهدر المدرسي فصلب الموضوع وهوما باغيين الشعب اطوع
مبان ليكوم غير الماء فثيران بشرى ليكوم يابنوا عريبان ياقلوب القطران
لامعقول لادين زين لاحياة زينة لاهمة لاشان
ومبان ليكوم غير الماء فثيران يابنو عريبان يالشعب الكسلان
نتوما تجروا خلف الكورة وهوما يعمروا فلمثمورة
تالين وحنا أمة محكورة وينعل بوا الدل لي خلاني عايش عيشة مقهورة
واش مبان ليكوم غير الماء فثيران ومبان ليكوم الشعب الهلكان
تالين وحنا نحرقوا فأعصابنا ونهرسوا فلكيسان وطبالي ونكملوا بلبرارد ألمقالي
هادي البارصا وهادي الريال وها لحمر والزرق والخضر يعطي لبوهوم الضر
ينعل بو الجامعة والأندية والمكاتيب ويعطيهوم مصائيب فمصائيب هوما يتغناوا وحنا بلفقر نتبلاو
تلاهينا وسهينا وللجام تقتع فدينا
شي لاهاوه بلكورة وشي بلقمر وشي بلكاس وسهر
وشي على النميمة مسند لحيوط ومعاه شلا رهوط هالي فدخان يسوط وهالي فبنت الحومة مربوط وهالي مقطر أمسخوط
الرجال تلاهاو بالقرعة والكاس وعيالاتهوم بلقورعة والوسواس والله احد الباس
من أمة معندها ساس لا تربيا زينة لاكلام يفرح لاعلى من تمسي ولا على من تصبح
حنا تبعنا البليات والمسؤولين جمعوا الريالات وشطحوا يا الرجال وزغرتوا يالعيالات
عامكوم هدا مافيه لادين لاشهادا شي خارج بزراوط وشي بسيوفة وشي يضرب بلفرادة
بقافيكوم غير الثيران لي عمر بلماء ومابقاو فيكوم لمزاليط بلا نعمة
ينعل بو الثيران والجامعة والحكومة والبرلمان ونعل بو المجاليس وكل رئيس عيان
ينعل بو النقابات والجمعيات وكل من تعدا على هاد الشعب الهلكان
مبان ليكوم غير الماء فثيران
اوى ديروا دابا مشاركة ولا الجيم ولا الميم ولا طلبوا التسليم
ولا باقي تفرعوا لينا روسنا بلمقالات الخاويين
وليتوا بحال قصة لعروسة لي مافيها صباح أمها تركز فصطاح حمزة الحزين