‫النادي العراقي في الامـــارات Iraqi club in UAE‬

اول شي نرحب بأعضاءنا الجدد .. منورين كلكم وكل واحد بيكم اضافة مميزة لعائلتنا الحلوة ... والاعضاء القديمين المخضرمين انتوا عالراس كللكم ....
احنا اهنا ملتمين كعائلة ومو بس مجرد كروب ... وطبعا هالعائلة ملتقى للناس الراقيين والواعيين والمثقفين والموهوبين ... طبعا كل عائلة يحتاجله شوية احكام وضوابط حتى ما نزعل احد ونحافظ على هاللمة الحلوة ... فهالبوست تذكير بسيط بقوانين الكروب نتمنى انه تراعوها وتاخذوها بعين الاعتبار ...
1- الوجهة الرئيسية للكروب ثقافي ومو تحشيشي صح نريد نغير جو ونخفف ضغوطات الحياة اليومية وملل الروتين عن نفسنا بس لازم نحافظ على صورة عائلتنا ..
2- مراعاة نوعية البوستات يعني يا حبذا تكون علمية وثقافية اكثر شي .. ومو كلشي تنزلوه .. وفعالية العضو مو بعدد بوستاته وانما بنوعيته واشكد يشارك وية بوستات اللخ ... ويكون اكو فاصل وقتي بين بوست وبوست مو حشك حتى نكدر نعلق ونشارك ..
3 - طبعا بين فترة وفترة نجتمع بمكان عام ونتعرف على بعض حتى تتقوى علاقاتنا اكثر ..بس قرار الطلعات يكون حصرا بموافقة وعلم الادمنز وطبعا نتقبل اقتراحاتكم
4- احنا قبلنا طلبات هواية ناس وما اتقيدنا بفئة عمرية معينة .لان احنا نتعامل وية الناس حسب عقلهم مو عمرهم .. فألاحترام واجب على كل عضو سواء جبير او صغير .. يعني لا الصغير يتطاول الكبير ولا الكبير يقلل من قيمة الصغير ..
5 - يرجى عدم التطرق الى المواضيع السياسية .. صح منكدر ما نحجي بالسياسة لان هاي جزء من واقع وطننا... في حال انه اي شخص حب انه ينتقد نقد بناء للي يصير بوطننا وليس تحشيش هاي اهلا وسهلا بيه ..
6 - احنا اهنا بالكروب عرب واكراد وتركمان وويانا ناس من غير جنسيات .. فيا ريت محد يمس اي قومية او طائفة بأي شكل من الاشكال ...
7 - عدم نشر صور شخصية عالكروب .. عدا صور الاعضاء الي يطلعون ويلتمون وهاي اكيد بعد موافقتهم ..
8 - طبعا اكو هواااية موهوبين ويانا ويا ريت لو ينزلون اشعارهم وصورهم ولوحاتهم واقل شي احنا نسويه انه نشجعهم ونساندهم حتى عالاقل بلايك ...
9 - الي عنده معارض وتجمعات عراقية يذكره للادمنز واحنا ننشرله روابط وهالسوالف ونحاول قدر الامكان انه نحضر ونساندهم ..
واخيرا وليس اخرا ... الي عنده اي اشكال او شكوى او طلب يلتجئ لاحمد الي هو مسؤول الكروب ..
اني جوكليت انجل و بالخدمة ..
تحياتي الكم وشكرا